کراچی کے علاقے ملیر الفلاح میں ایک افسوسناک واقعہ پیش آیا جہاں چند نامعلوم افراد نے ایک مقامی شہری پر بدترین تشدد کیا۔اس تشدد کی ویڈیو سوشل میڈیا پر وائرل ہوتے ہی شہری حلقوں میں شدید غم و غصے کی لہر دوڑ گئی۔
ذرائع کے مطابق، ویڈیو میں دیکھا جا سکتا ہے کہ متاثرہ شہری کو نہ صرف زدوکوب کیا گیا بلکہ برہنہ کرکے انسانیت سوز سلوک کا نشانہ بنایا گیا۔ ملزمان نے ظلم کی انتہا کرتے ہوئے اس منظر کو ریکارڈ کیا اور پھر ویڈیو مختلف سوشل میڈیا پلیٹ فارمز پر شیئر کر دی۔
ویڈیو وائرل ہونے کے بعد ایس ایس پی کورنگی نے فوری ایکشن لیتے ہوئے واقعے کا سخت نوٹس لیا۔ پولیس کی خصوصی ٹیم نے علاقے میں کارروائی کی اور نجی ٹارچر سیل پر چھاپہ بھی مارا، تاہم ملزمان موقع سے فرار ہونے میں کامیاب ہوگئے۔
پولیس کے مطابق ابتدائی شواہد سے ظاہر ہوتا ہے کہ یہ واقعہ کسی ذاتی دشمنی یا علاقے کے تنازع کا نتیجہ ہو سکتا ہے، تاہم حتمی رائے تفتیش مکمل ہونے کے بعد ہی سامنے آئے گی۔
دوسری جانب پولیس نے اس واقعے کا متاثرہ شہری کا سراغ لگانے کے لیے تفتیش شروع کر دی ہے تاکہ نہ صرف حقائق سامنے آئیں بلکہ ملوث ملزمان کو قانون کے کٹہرے میں لایا جا سکے۔
علاقہ مکینوں کا کہنا ہے کہ اس طرح کے واقعات نہ صرف معاشرتی بگاڑ کی علامت ہیں بلکہ قانون نافذ کرنے والے اداروں کے لیے ایک بڑا چیلنج بھی بن چکے ہیں۔ شہریوں نے مطالبہ کیا ہے کہ ملزمان کو فوری گرفتار کر کے عبرت کا نشان بنایا جائے تاکہ آئندہ کوئی بھی اس طرح کی درندگی کی جرات نہ کرے
ایک تبصرہ شائع کریں