کارارا کے میدان میں شام کے وقت تماشائیوں کا جوش اپنے عروج پر تھا۔ ایک طرف آسٹریلیا کی ٹیم، جو ہمیشہ گھریلو میدان پر ناقابلِ شکست سمجھی جاتی ہے، تو دوسری جانب بھارت، جو اس سیریز میں نیا عزم لے کر اتری تھی۔
چوتھے ٹی ٹوئنٹی میچ کا آغاز بھارت کی بیٹنگ سے ہوا۔ ابتدا میں آسٹریلوی بالرز نے دباؤ ضرور ڈالا، مگر شبھمن گل نے اپنی مخصوص پراعتماد اسٹائل میں گیندوں کو باؤنڈری کی راہ دکھائی۔ 46 رنز کی اننگز نے بھارتی ٹیم کی بنیاد مضبوط کر دی۔
ابھیشیک شرما اور کپتان سوریا کمار یادو نے بھی تیز رفتار بیٹنگ کی، جبکہ اکشر پٹیل نے آخر میں صرف 11 گیندوں پر 21 رنز بنا کر ٹیم کا مجموعہ 168 تک پہنچا دیا۔
جب آسٹریلیا میدان میں اتری تو تماشائیوں کو ایک سنسنی خیز مقابلے کی امید تھی، مگر بھارتی بولرز کا جادو چل پڑا۔ واشنگٹن سندر نے شاندار اسپیل میں تین کھلاڑیوں کو آؤٹ کیا، جبکہ اکشر پٹیل اور شیوم دوبے نے دو دو شکار کیے۔
ایک وقت ایسا بھی آیا جب آسٹریلیا کے بیٹسمینوں کے قدم وکٹ پر جم ہی نہیں پائے۔ کپتان مچل مارش نے 30 رنز کے ساتھ کچھ مزاحمت دکھائی، لیکن ٹیم 18.2 اوورز میں صرف 119 رنز پر ڈھیر ہو گئی۔
بھارت نے یہ میچ 48 رنز کے واضح فرق سے جیت کر پانچ میچوں کی سیریز میں 2-1 کی برتری حاصل کر لی۔
اکشر پٹیل کو آل راؤنڈ کارکردگی دکھانے پر “میچ کا بہترین کھلاڑی” قرار دیا گیا۔
یہ جیت بھارتی ٹیم کے لیے نہ صرف سیریز کی کامیابی کی جانب قدم ہے بلکہ نوجوان کھلاڑیوں کے اعتماد میں اضافہ کا باعث بھی بنی ہے۔
ایک تبصرہ شائع کریں